Sa ulëse i parashikon Cakolli VV-së pas votave të diasporës?
Analiza e KDI-së vlerëson se numërimi i votave me postë i sjell deri në 52 ulëse VV-së, por gara për mandate të caktuara mbetet e hapur.
PRISHTINË — Hulumtuesi nga Instituti Demokratik i Kosovës (KDI), Eugen Cakolli, ka deklaruar se Lëvizja Vetëvendosje mund të arrijë deri në 52 ulëse në Kuvendin e Kosovës. Kjo, sipas tij, nëse trendi aktual i rezultateve nga votat me postë vazhdon deri në përfundim të procesit të numërimit.
Përmes një analize të publikuar lidhur me ecurinë e numërimit të votave nga diaspora, Cakolli ka vlerësuar se numri total i votave të vlefshme me postë pritet të arrijë në rreth 82 mijë e 500, nëse ritmi dhe përqindjet aktuale mbesin të pandryshuara deri në fund të procesit.
Sipas tij, rezultatet e deritanishme tregojnë dallime të dukshme mes mënyrës së votimit me postë dhe asaj të zhvilluar në ambasada dhe konsullata. Kjo, sipas tij, po ndikon drejtpërdrejt në projeksionet për ndarjen e mandateve në Kuvend.
Cakolli ka theksuar se përbërja përfundimtare e Kuvendit ende nuk mund të konsiderohet e mbyllur, pasi gara për disa mandate vazhdon të mbetet e hapur mes subjekteve politike. Procesi i numërimit të votave me postë po vazhdon, ndërsa rezultatet përfundimtare të tij pritet të kenë ndikim të rëndësishëm në shpërndarjen e mandateve parlamentare dhe në konfigurimin e ardhshëm të Kuvendit të Kosovës.
Burim: Klan Kosova
— Redaksia ZHURMA