Cakolli: Haxhiu shkeli Kushtetutën me caktimin e seancës

PRISHTINË — Eugen Cakolli nga Instituti Demokratik i Kosovës ka deklaruar se caktimi i seancës konstituive të Kuvendit jashtë afatit të përcaktuar nga Gjykata Kushtetuese përbën një shkelje të mirëfilltë kushtetuese të kryer tashmë, dhe jo thjesht një rrezik të mundshëm.

Sipas Cakollit, interpretimi i vjetër se Kuvendi vetëm duhet të mblidhet brenda 30 ditëve nuk vlen më. Gjykata Kushtetuese në qershor të vitit 2025 e ka saktësuar se i gjithë procesi i konstituimit duhet të përmbylet brenda këtij afati të ngushtë.

Deri në mes të vitit të kaluar, praktika parlamentare lejonte thirrjen e seancës konstituive brenda 30 ditëve, ndërsa procesi mund të zgjatej për muaj të tërë. Një shembull i tillë kishte ndodhur në vitin 2014, kur konstituimi i Kuvendit kishte marrë deri në gjashtë muaj kohë.

Megjithatë, Gjykata Kushtetuese tashmë e ka precizuar se mbajtja e seancës konstituive nuk nënkupton vetëm praninë fizike të deputetëve në sallë. Ky proces përfshin betimin e deputetëve, formimin e komisioneve, ndarjen e mandateve, si dhe zgjedhjen e kryetarit dhe pesë nënkryetarëve brenda këtij afati.

Në këtë kuadër, Cakolli ka drejtuar kritika ndaj ushtrueses së detyrës së presidentes, Albulena Haxhiu. Sipas tij, caktimi i seancës në ditën e 29-të ka qenë një vendim i papërgjegjshëm që ka pamundësuar dhe ka kufizuar tërësisht hapësirën për konsulta politike mes partive.

Po të caktohej kjo seancë më herët, bisedimet politike do të mund të zhvilloheshin paralelisht me përgatitjet. Në këtë mënyrë, subjektet politike nuk do të kishin nevojë të konsumonin të gjitha ditët e afatit kushtetues pa arritur asnjë marrëveshje paraprake për konstituim të Kuvendit.

Së fundmi, Cakolli paralajmëron se thirrja e seancës për nesër mund të jetë një taktizim politik i Vetëvendosjes. Në mungesë të opozitës, partia në pushtet mund të procedojë me votimin e kryetarit, duke ua faturuar të tjerëve dështimin për zgjedhjen e pesë nënkryetarëve.

Burim: Gazeta Dukagjini
— Redaksia ZHURMA