Bylykbashi: Afat PS-së deri në orën 11:00 për ndryshimin e rendit të ditës
Partia Demokratike kërkon ndryshimin e rendit të ditës në Komisionin e Reformës Zgjedhore, duke kërkuar fokus te rekomandimet e ODIHR.
Redaksia ZHURMA · · Përditësuar · 1 min lexim
Bashkëkryetari i Komisionit të Posaçëm për Reformën Zgjedhore, Oerd Bylykbashi, i ka kërkuar sekretarisë që deri në orën 11:00 t'i komunikohet anëtarëve rendi i ditës i ndryshuar, duke kërkuar heqjen e pikës lidhur me hartën e re territoriale. Përmes një kërkesë të dërguar bashkëkryetarit socialist Damian Gjiknuri dhe anëtarëve të tjerë, Bylykbashi thekson se kjo pikë u fut në mënyrë të njëanshme dhe nuk përbën rekomandim të OSBE/ODIHR.
Bylykbashi kërkon që në vend të saj të diskutohet çështja prioritare e rekomandimeve të ODIHR për ndarjen e shtetit nga partia dhe ndalimin e abuzimit me pushtetin shtetëror në zgjedhje. Sipas tij, kjo temë është diskutuar në muajt qershor-korrik dhe kërkon përfundim para zgjedhjeve të 9 majit 2027, duke kujtuar se mandati i Komisionit mbaron më 30 nëntor.
Mbledhja e Komisionit është planifikuar për në orën 13:00, ndërsa në rendin aktual janë parashikuar diskutimet mbi detyrimet nga harta e re territoriale dhe projektligji për financimin e partive politike.
