Kinemaja Verore e Lumbardhit mbyll korrikun me "Butterflies"
Filmi i regjisorit turk Tolga Karaçelik sjell historinë e tre vëllezërve dhe motrave të larguar prej njëri-tjetrit
PRIZREN — Programi i Kinemasë Verore të Lumbardhit, i cili po zhvillohet në hapësirën DokuKino Plato në Prizren do të përmbyllë ciklin e shfaqjeve për muajin korrik me filmin "Butterflies" nga regjisori turk Tolga Karaçelik. Sipas organizatorëve, gjatë këtij muaji Kinemaja Verore ka sjellë një seri filmash nën temën "Përtej rebelimit dhe absurdit", duke trajtuar forma të ndryshme të zbulimit të identitetit, marrëdhëniet familjare dhe shoqërore, si dhe mënyrën se si kinemaja na nxit të reflektojmë mbi barrierat që ndërtohen në shoqëri.
Programi nisi me filmin "Persepolis", me regji nga Marjane Satrapi dhe Vincent Parannoud, ndërsa javën pasuese u shfaq filmi "Corpus Christi", me regji nga Jan Komasa. Ndërsa filmi i fundit për muajin korrik, "Butterflies" sjell historinë e tre vëllezërve dhe motrave të larguar prej njëri-tjetrit, e cila ndërthuret me motive surrealiste të jetës rurale.
Shfaqja e "Butterflies" do të mbahet të premten më 31 korrik, në DokuKino Plato në Prizren, duke filluar nga ora 20:30. Programi i Kinemasë Verore të Lumbardhit mbështetet nga Ministria e Kulturës dhe Turizmit, përkrahet nga programi i Fondacionit Kosovar për Shoqëri Civile (KCSF) "EJA Kosovë", bashkëfinancuar nga Agjencia Zvicerane për Zhvillim dhe Bashkëpunim dhe Suedia, si dhe nga DokuFest. Burim: Telegrafi, https://telegrafi.com/butterflies-permbyll-kinemane-verore-te-lumbardhit-per-muajin-korrik/
— Redaksia ZHURMA
