BQK lanson Dashboard-in e parë të të dhënave sipas gjinisë
Çfarë zbulon transparenca e re për qasjen e grave në kredi?
PRISHTINË — Banka Qendrore e Republikës së Kosovës (BQK) ka publikuar Dashboard-in e parë me statistika të ndara sipas gjinisë në sektorin financiar, duke shënuar hapin e parë drejt adresimit të boshllëkut statistikor në këtë fushë.
Raportimi i këtyre të dhënave ka filluar në korrik 2025, ndërsa obligimi për raportimin u vendos përmes rishikimit të Manualit për Raportim në Regjistrin e Kredive të Kosovës, të miratuar në qershor 2025. Rishikimi dhe zhvillimi i Dashboard-it u realizuan në kuadër të iniciativës ndërkombëtare WE Finance Code, e cila zbatohet në më shumë se 30 vende.
Për herë të parë, Dashboard-i mundëson monitorimin e indikatorëve kyç: numri dhe vlera e kredive, normat e interesit, kreditë joperformuese, niveli i kolateralizimit dhe kreditë e refuzuara — të gjitha të ndara sipas gjinisë. Iniciativa zbatohet në Kosovë nën udhëheqjen e BQK-së, në bashkëpunim me Bankën Evropiane për Rindërtim dhe Zhvillim (BERZH).
Dashboard-i u prezantua gjatë pjesëmarrjes së BQK-së në panelin "Qasja në financa për gratë ndërmarrëse" në kuadër të konferencës "Gratë në Biznes — She Rises 2026", të organizuar nga Ministria e Industrisë, Ndërmarrësisë, Tregtisë dhe Inovacionit. Të dhënat synojnë të ndihmojnë në identifikimin e sfidave dhe mundësive për përmirësimin e qasjes së grave në financa.
Burim: Telegrafi
— Redaksia ZHURMA
