Si e priti Bogujevci ekipin e "Dua" pas çmimit në Kanë?

PRISHTINË — Ministrja në detyrë e Kulturës dhe Turizmit, Saranda Bogujevci, ka mirëpritur ekipin e filmit “Dua” pas suksesit në Festivalin e Filmit në Kanë. Ajo ka përgëzuar regjisoren Blerta Basholli për çmimin “SACD” në kuadër të “Semaine de la Critique”.

Në një postim në Facebook, Bogujevci shkroi se çmimi, i ndarë nga Shoqata e Autorëve dhe Kompozitorëve Dramaturgjikë në Francë, “dëshmon fuqinë krijuese dhe nivelin artistik që po arrijnë filmbërësit tanë në botë”. Ajo e cilësoi filmin “sukses i merituar që na bën krenarë të gjithëve”.

“Dua” është prodhim i kinematografisë kosovare që ka tërhequr vëmendje ndërkombëtare në një nga festivalet më prestigjioze të botës.

Burim: Telegrafi
— Redaksia ZHURMA