Bogojevski: Shqiptarët nuk i lejojnë gratë të turpërohen në kafene

Lideri i partisë “Koncepti Maqedonas”, Petar Bogojevski, ka ngjallur reagime të shumta pas deklaratave të tij publike mbi rolin e gruas në familje, ku ka marrë shqiptarët si shembull për atë që e cilëson si kontroll të burrave ndaj bashkëshorteve. Gjatë një paraqitjeje në emisionin “Pod lupa” në TV Alfa dhe në një video të publikuar më 3 nëntor, ai pretendon se reagimi i një burri ndaj tradhtisë nuk paraqet dhunë, por mbrojtje të dinjitetit, duke shtuar se gruaja duhet të qëndrojë nën mbikëqyrjen e bashkëshortit. Ai gjithashtu u drejtua ndaj burrave maqedonas duke deklaruar se shqiptarët nuk lejojnë që gratë e tyre të turpërohen nëpër kafene dhe rrugët e Shkupit.

Këto qëndrime kanë shkaktuar reagime të menjëhershme nga institucionet dhe figura publike. Akademia Ushtarake “Gjeneral Mihailo Apostolski”, ku Bogojevski ushtron detyrën e docentit, ka njoftuar se organet kompetente do të shqyrtojnë materialet për të vlerësuar nëse janë shkelur detyrimet etike dhe profesionale. Nga ana e saj, zëdhënësja e Qeverisë dhe kryetarja e Unionit të Grave të VMRO-DPMNE-së, Marija Miteva, ka dënuar deklaratat duke theksuar se grave u duhet respekti e jo mbikëqyrja e burrit. Ndërkohë, Agjencia për Shërbime Mediatike Audio dhe Audiovizuale ka vlerësuar se nëpërmjet kësaj paraqitjeje janë relativizuar dhe justifikuar dhuna ndaj grave dhe fëmijëve, duke tentuar të paraqitet nënshtrimi i tyre si vlerë tradicionale.