Bizneset pa autorizim ndalohen të dërgojnë mbeturina në Sferkë
Kompania "Ambienti" njoftoi se vendimi hyn në fuqi nga 10 gushti, ndërsa kontrollet në terren dhe në hyrje të deponisë do të shtohen.
PEJË — Kompania Rajonale e Mbeturinave “Ambienti” Sh.A. ka njoftuar se nga e hëna, 10 gusht 2026, bizneset nuk do të lejohen t’i dërgojnë vetë mbeturinat në Deponinë Sanitare Rajonale në Sferkë të Thatë. Ky kufizim do të zbatohet për të gjitha bizneset që nuk posedojnë një autorizim paraprak nga kjo kompani.
Sipas njoftimit zyrtar, kjo masë e re ndërmerret me qëllim të rregullimit të shërbimit, pasi kompania “Ambienti” ofron shërbim të rregullt të grumbullimit dhe transportit të mbeturinave sipas itinerareve të përcaktuara. Kjo bëhet në përputhje me kontratat ekzistuese që ndërmarrja ka me klientët e saj juridikë.
Kompania u ka bërë thirrje bizneseve që ta përdorin shërbimin e saj të grumbullimit dhe t’i kryejnë me kohë obligimet financiare. Po ashtu, do të shtohen kontrollet në terren dhe në hyrje të deponisë, ndërsa rastet e dërgimit të paautorizuar do të trajtohen sipas ligjit në fuqi.
Burim: Sinjali
— Redaksia ZHURMA