Bisedimet në Abu Dhabi për Ukrainën ndërmjetësuar nga SHBA

Përfaqësuesit e Rusisë dhe Ukrainës po shfaqin fleksibilitet privat lidhur me një shkëmbim të mundshëm territorial, teksa Presidenti amerikan Donald Trump intensifikon përpjekjet për zgjidhjen e konfliktit. Kështu bëri të ditur një zyrtar i lartë amerikan, i cili informoi gazetarët në prag të bisedimeve të ndërmjetësuara nga Shtetet e Bashkuara që nisin në Abu Dhabi. Sipas të njëjtit burim, marrëveshjet territoriale mund të arrihen në përfundim të negociatave, pasi të jenë dakordësuar çështje të tjera thelbësore.

Gjatë takimeve, temë kryesore e diskutimeve do të jenë garancitë e sigurisë për Kievin, përfshirë mundësinë e një mbrojtjeje të ngjashme me Artikullin 5 të NATO-s. Pozicionet e deritanishme kanë qenë të ngurta sa i takon çështjes së tokave, ku autoritetet ukrainase kërkojnë rikthimin në kufirin origjinal, kurse presidenti rus Vladimir Putin synon kontrollin e të gjithë rajonit të Donbasit. Megjithatë, palët po lënë hapësirë për kompromise përmes kanaleve private.