Merz: Pa marrëveshje për Ukrainën, s'ka buxhet të BE-së

Kancelari gjerman Friedrich Merz ka kushtëzuar arritjen e marrëveshjes për buxhetin e ardhshëm shumëvjeçar të Bashkimit Evropian me miratimin e një pakete financiare prej 45 miliardë eurosh për Ukrainën. Në një letër drejtuar presidentit të Këshillit Evropian, António Costa, Merz kërkoi që mbështetja për Kievin të përfshihet në negociatat buxhetore, duke paralajmëruar se «nëse nuk ka një zotim të përbashkët që të gjithë, pa përjashtim, të kontribuojnë në mënyrë të drejtë për mbulimin e këtij hendeku financiar, atëherë nuk mund të zgjidhet kjo çështje dhe as të diskutohen çështje të tjera, veçanërisht ato që kanë pasoja financiare».

Ukraina përballet me një mungesë prej rreth 70 miliardë eurosh në buxhetin e vitit 2027 për shkak të dëmeve nga sulmet ruse. Ndërkohë, sipas të dhënave konfidenciale të agjencisë ruse Rosstat të siguruara nga grupet e hakerëve Cyber Partisans dhe Silent Crow, rreth 400 mijë qytetarë rusë dyshohet se kanë humbur jetën në luftë që nga shkurti i vitit 2022. Sipas përllogaritjeve të grupit bjellorus, deri në gusht ishin vrarë të paktën 393.881 rusë, ndërsa grupi ukrainas e çon shifrën në 450.100. Këto shifra nuk janë verifikuar në mënyrë të pavarur, ndërsa Shtabi i Përgjithshëm ukrainas pretendon për humbje të larta të përditshme.

Përpjekjet diplomatike po zhvillohen paralelisht në Abu Dhabi përmes negociatave trepalëshe mes Rusisë, Ukrainës dhe Shteteve të Bashkuara, ku i dërguari i Donald Trump, Jared Kushner, ka kërkuar dialog të drejtpërdrejtë mes Rusisë dhe Europës. Kremlini ka konfirmuar pjesëmarrjen e delegacionit rus të kryesuar nga Vladimir Medinsky, ndërsa zëdhënësi Dmitry Peskov theksoi se negociatat janë trepalëshe dhe të ndërmjetësuara nga amerikanët. Nga ana e tij, Merz kërkon që diskutimet për buxhetin dhe financimin e Ukrainës të vendosen si prioritet në samitin e liderëve në Dublin, duke gjetur mbështetjen e vendeve si Danimarka, Finlanda, Holanda dhe Suedia, ndërkohë që Hungaria, Sllovakia, Bullgaria dhe Republika Çeke kanë sinjalizuar se nuk do të japin ndihma shtesë financiare.