Biletat e shitura plotësisht për ndeshjen ndaj Finlandës në «Air Albania»

Në kuadër të angazhimeve për sfidat e radhës ndaj Finlandës dhe Bjellorusisë, Kombëtarja shqiptare zhvilloi një tjetër seancë stërvitore në ambientet e «Shtëpisë së Futbollit». Siç bën të ditur Departamenti i Komunikimit në FSHF, puna nisi në palestër dhe më pas skuadra u zhvendos në fushë, ku trajneri Rolando Maran punoi me të gjithë lojtarët në dispozicion rreth aspekteve taktike dhe situatave të ndryshme të lojës.

Gjatë kësaj seance, Arbër Hoxha dhe Cristian Shpendi zhvilluan ushtrime të diferencuara në fushë, pasi po ndjekin procesin e rikuperimit nga dëmtimet e pësuara prej goditjeve në ndeshjet e fundit me klubet e tyre. Megjithatë, të dy futbollistët pritet të bashkohen me grupin e plotë gjatë stërvitjes zyrtare të nesërme, e cila do t'i paraprijë përballjes së Ligës së Kombeve.

Për sa i përket agjendës, Kombëtarja do të mbajë stërvitjen zyrtare në orën 11:00, me 15 minutat e para të hapura për mediat, ndërsa konferenca e trajnerit Maran dhe një lojtari është caktuar për në orën 16:00 në stadium. Nga ana tjetër, ekipi përfaqësues i Finlandës do të dalë në konferencë për shtyp në orën 11:30 dhe do të zhvillojë seancën e vet në orën 12:30.

Ndeshja mes Shqipërisë dhe Finlandës, e vlefshme për UEFA Nations League, do të luhet të enjten në orën 20:45 në stadiumin «Air Albania». Interesi për këtë përballje ka qenë i lartë, pasi të gjitha biletat janë shitur dhe impianti sportiv pritet të jetë i mbushur në kapacitet të plotë.