Bilanci katërditor në Tiranë: 156 të lënduar gjatë protestave

TIRANË — Gjatë katër ditëve të protestave të dhunshme në Tiranë janë lënduar 156 persona, mes të cilëve 97 efektivë policie, 45 protestues, 12 kalimtarë dhe katër të mitur, sipas ministrit të Brendshëm, Ervin Demo. Ndërkohë, Qendra Spitalore Universitare e Tiranës ka njoftuar se vetëm gjatë protestës së fundit, deri në orën 18:45, 11 persona kanë kërkuar ndihmë mjekësore, mes tyre gjashtë protestues, tre policë dhe dy kalimtarë.

Ministri Ervin Demo u ka uruar shërim të shpejtë të lënduarve dhe ka dënuar përdorimin e të miturve në akte dhune, duke u bërë thirrje prindërve që të mos lejojnë përfshirjen e fëmijëve në përplasjet politike. Sipas tij, numri i studentëve mes personave të arrestuar dhe proceduar është shumë i vogël, ndërsa ka theksuar se dhuna nuk duhet të cenojë rrugëtimin e Shqipërisë drejt Bashkimit Europian.

Nga ana e QSUT-së është bërë e ditur se në urgjencë po trajtohen dy protestues dhe një zyrtar policor, të cilët ndodhen në gjendje të mirë shëndetësore dhe po u nënshtrohen ekzaminimeve. Gjatë zhvillimeve të fundit, policia ka ndërmarrë ndërhyrje për të shpërndarë protestuesit nga zona përballë ish-hotel “Dajtit”, ndërsa kreu i Partisë Demokratike, Sali Berisha, u ka bërë thirrje qytetarëve, prindërve dhe bizneseve që të solidarizohen me studentët në protestën e thirrur për të shtunën.