Berisha: Rama kërkon ta ktheje Shqipërinë në çiflig të mafies

KUKËS — Kreu i Partisë Demokratike, Sali Berisha, u shpreh gjatë një takimi në Kukës se kryeministri Edi Rama «kërkon të dëbojë masivisht shqiptarët nga Shqipëria dhe kërkon të shtrojë Shqipërinë përfundimisht në një çiflig të drogës dhe mafies më të rrezikshme në Europë». Gjatë tubimit të zhvilluar me drejtuesit e degëve të Partisë Demokratike, ai vlerësoi qëndrimin e qytetarëve dhe përmendi lëvizjen e fuqishme popullore të muajve të kaluar.

Berisha theksoi se protestat e zhvilluara përfshinë qindra mijëra qytetarë dhe se në to shkëlqeu guximi i vajzave të universiteteve dhe gjimnazeve të Tiranës. Sipas kreut demokrat, përballë kësaj fryme opozitare dhe popullore, të rinjtë i dhanë qeverisë «dënimin, vdekje politike pa apel», ndërsa periudhën e fundit e cilësoi si një nga më pozitivet në historinë kombëtare.