Bejko: Berisha është pengesa kryesore e opozitës dhe nuk është zgjidhja
Analisti Roland Bejko deklaroi se Partia Demokratike ka kandidatë të mirë, por lidershipi aktual dhe Sali Berisha mbeten pengesë.
Redaksia ZHURMA · · 2 min lexim
Gjatë një paraqitjeje në emisionin «Ora e Fundit», analisti Roland Bejko diskutoi zhvillimet brenda Partisë Demokratike, përgatitjet për zgjedhjet vendore dhe vështirësitë në krijimin e një alternative fituese në Tiranë. Sipas tij, vendimi për të kërkuar emrat e kandidatëve në vend të mobilizimit të demokratëve në protesta vjen nga fakti se ai ka marrë kontrollin e sheshit dhe afatet po afrohen.
Bejko vlerësoi se problemi kryesor i opozitës nuk qëndron te mungesa e kandidaturave, por te lidershipi aktual i partisë. «Partia Demokratike ka kandidatë, ka kandidatë shumë të mirë. Po sapo ata i afrohen Berishës, ata e kompromentojnë fytyrën e tyre», u shpreh ai, duke shtuar se figura e tij pengon edhe një koalicion të gjerë opozitar. «Berisha nuk është zgjidhja në këtë rast, Berisha është vetë problemi», deklaroi analisti, duke theksuar se ish-kryeministri e ka përfunduar ciklin politik dhe mban peng opozitën.
Gjithashtu, u trajtua edhe mundësia e ngritjes së një force të re politike, pasi një pjesë e elektoratit kërkon një opsion tjetër. «Elektorati shqiptar pret një formacion, një alternativë të tretë. Është i dëshiruar që të ketë një alternativë, të gjejë një kuti serioze për të hedhur votën e tij përtej Berishës dhe Ramës», përfundoi Bejko.
