Çfarë kërkon Begaj nga shkenca shqiptare për rrugën drejt BE-së?

TIRANË — Presidenti Bajram Begaj mori pjesë sot në Konferencën Shkencore Ndërkombëtare mbi Toponominë dhe Identitetin Kulturor Shqiptar, të organizuar nga Instituti i Antropologjisë pranë Akademisë së Shkencave. Tema e konferencës — "Kur toka flet me emra. Gjurmime antropologjike dhe gjuhësore" — e vendosi shkencën shqiptare në qendër të debatit për integrimin europian.

"Shqipëria shkon drejt Bashkimit Evropian jo duke lënë pas vetes identitetin e saj, por duke e marrë atë me vete si vlerë të shtuar," deklaroi Begaj. Presidenti shtoi se Evropa nuk kërkon zbehjen e kulturave kombëtare, por është "ndërtuar mbi bashkëjetesën e gjuhëve, traditave, kujtesës dhe përvojave të ndryshme historike."

Begaj e quajti integrimin "jo vetëm projekt institucional i së tashmes, por edhe ritakim zyrtar me një hapësirë ku, në kuptimin kulturor, kemi qenë gjithmonë të pranishëm." Dokumentimi i kësaj kujtese, tha ai, dëshmon se trashëgimia shqiptare ka qenë gjithmonë pjesë e qytetërimit evropian.

Kreu i Shtetit vlerësoi shtrirjen e studimeve përtej hartës së Shqipërisë, duke përfshirë trevat rajonale, diasporën, arbëreshët dhe komunitetet arvanitase. Ai theksoi gjithashtu rëndësinë e përfshirjes së rinjve dhe shkollave: "Çdo projekt që e afron rininë me dijen, me kërkimin dhe me kulturën kombëtare meriton mbështetje," tha Presidenti.

Në mbyllje, Begaj inkurajoi akademiket dhe kërkuesit shkencorë të vijojnë nismave të tilla dhe t'i shndërrojnë në model bashkëpunimi mes institucioneve, shkollave, komuniteteve dhe diasporës. "Kur toka flet me emra, ajo nuk flet vetëm për të shkuarën — ajo na flet edhe për përgjegjësinë që kemi ndaj së ardhmes," deklaroi ai.

Burim: ATSH
— Redaksia ZHURMA