BE: Ndryshimet për Ligjin e Speciales ngrenë shqetësime serioze

Kuvendi i Kosovës pritet të votojë ndryshimet në Ligjin për Dhomat e Specializuara, duke sjellë reagimin e ri të Zyrës së Bashkimit Evropian në Kosovë. Institucioni evropian ka shprehur shqetësim lidhur me mundësinë e votimit, duke vlerësuar përmes një reagimi publik se nismat e propozuara ngrenë pikëpyetje serioze për përmbushjen e obligimeve ndërkombëtare të vendit dhe respektimin e parimeve të sundimit të ligjit.

Sipas BE-së, vërejtjet lidhen veçanërisht me pavarësinë e gjyqësorit, mbrojtjen e viktimave dhe dëshmitarëve, vazhdimësinë e të drejtave procedurale, sigurimin e llogaridhënies efektive, si dhe me kushtetutshmërinë e vetë ndryshimeve. Që nga kthimi i ligjit në Kuvend për rishqyrtim, autoritetet evropiane kanë qenë të angazhuara në komunikimin e pritjeve të tyre, duke theksuar nevojën për konsultime paraprake përpara çdo miratimi.