Sa lokacione po bastisen në Kosovë për dyshimet mbi importin e ujit si naftë?
Prokuroria Speciale ka nisur një aksion të gjerë në mbi 40 lokacione, nën dyshimet për një skemë mashtrimi ku importohej ujë nga Shqipëria në vend të naftës.
PRISHTINË — Prokuroria Speciale ka nisur në orët e hershme të mëngjesit të 1 korrikut një aksion të gjerë në mbarë Kosovën, ku autoritetet po kryejnë bastisje në disa lokacione të ndryshme. Ky hetim disamujor synon të shkatërrojë një rrjet të dyshuar të krimit të organizuar, që dyshohet se merrej me pastrim parash dhe shmangie të pagesave tatimore e doganore.
Në qendër të këtij operacioni madhor janë koordinuar disa agjenci shtetërore, ku krahas prokurorëve specialë po veprojnë Policia e Kosovës, Dogana dhe Hetimet Tatimore të ATK-së. Hetuesit tatimorë dyshojnë se ky grup i organizuar ka përdorur skema të ndërlikuara financiare për të realizuar transaksione fiktive në sektorin e derivateve të naftës.
Dyshimet më të rënda lidhen me skemën ku kompani importuese nga Shqipëria supozohet se kanë importuar ujë në vend të naftës. Për të fshehur gjurmët e këtij mashtrimi, ata kanë përdorur kompani fiktive, si dhe biznese aktive brenda Kosovës, me qëllim që të mbulonin transaksionet e paligjshme.
Bizneset e përfshira dyshohet gjithashtu se kanë lëshuar fatura fiktive për të shmangur obligimet tatimore dhe për të përfituar paligjshëm në kurriz të buxhetit shtetëror. Autoritetet konfirmojnë se aksioni është ende në zhvillim e sipër.
Burim: IndeksOnline
— Redaksia ZHURMA
Bisedoni
Komentet janë të hapura për anëtarët e Zhurma. Llogaria është falas — krijo një ose hyr në llogarinë tënde për me e thanë mendimin.