Kush po manipulon tragjedinë në autostradën Ibrahim Rugova?

PRISHTINË — Ushtruesi i detyrës së ministrit të Infrastrukturës dhe Transportit, Dimal Basha, ka reaguar pas debatit publik që u zhvillua lidhur me aksidentin tragjik në autostradën “Ibrahim Rugova”, ku humbi jetën një grua dhe një person tjetër mbeti i lënduar rëndë gjatë vikendit të fundit.

Përmes një deklarate publike, Basha hodhi poshtë pretendimet se ministria ka ndërmarrë vetëm largimin e dheut në segmentet problematike të autostradës. Ai theksoi se ministria ka nënshkruar kontrata për sanimin e plotë të skarpatave në tri segmente të autostradës “Ibrahim Rugova”, duke refuzuar pretendimet për “heqje dheu” siç u raportua në disa portale.

“Ministria sot ka njoftuar se ka nënshkruar kontrata për sanimin e plotë të skarpatave në autostradën ‘Ibrahim Rugova’. Pra nuk bëhet fjalë për ‘heqje dheu’, siç po manipulon Kryetari Rama dhe siç është raportuar në disa portale, por për projekte të sanimit të plotë të skarpatave në tri segmente të autostradës”, ka deklaruar Basha.

Ai ka reaguar edhe ndaj pretendimeve që lidhin aksidentin fatal me rrëshqitjet e dheut në atë pjesë të autostradës, duke theksuar: “Një ligësi tjetër është manipulimi me aksidentin që ndodhi gjatë vikendit. Siç është e njohur për publikun, autostrada ka qenë e pastruar nga dheu në momentin kur ka ndodhur aksidenti tragjik. Ne po presim raportin zyrtar të Policisë së Kosovës dhe refuzojmë të bëhemi pjesë e manipulimeve politike që tentojnë të përfitojnë nga tragjeditë njerëzore.”

Basha shprehu ngushëllime për familjen e viktimës, duke thënë: “Familjes së të ndjerës i shpreh ngushëllimet më të sinqerta. Na vjen keq që, përveç dhimbjes që ka shkaktuar ky aksident, Kryetari Rama dhe disa të tjerë po përpiqen të nxjerrin përfitime politike nga kjo tragjedi. Por nga mashtruesit dhe manipuluesit nuk pritet më shumë. Qytetarët i njohin mirë dhe këtë po e dëshmojnë me votë në çdo palë zgjedhje.”

Deklaratat e ushtruesit të detyrës së ministrit vijnë në kohën kur vazhdojnë reagimet dhe debatet rreth shkaqeve të aksidentit fatal në autostradën “Ibrahim Rugova”. Pritet që raporti zyrtar i Policisë së Kosovës të sqarojë rrethanat e plota të ngjarjes, duke hedhur dritë mbi shkakun e vërtetë të aksidentit.

Burim: Lajmi.net
— Redaksia ZHURMA