Bardhi: Fatura e TEC-eve lundruese të Vlorës shkon drejt 100 mln eurove

VLORË — Korporata Elektroenergjetike Shqiptare ka shpallur fituesin e një tenderi të ri prej 18.6 milionë eurosh, pa TVSH, për operimin dhe mirëmbajtjen e dy termocentraleve lundruese të Vlorës për dy vitet e ardhshme. Kryetari i Grupit Parlamentar të Partisë Demokratike, Gazment Bardhi, ka reaguar lidhur me këtë kontratë, duke e cilësuar atë si vazhdim të një afere korruptive të nisur me kontraktimin e dy TEC-eve lundruese nga Belinda Balluku. Sipas Bardhit, me shpenzimet e reja, fatura totale e projektit po shkon drejt 100 milionë eurove, ndërsa ka kritikuar SPAK-un për mungesë veprimi prej dy vitesh ndaj kësaj çështjeje.

Bardhi ka akuzuar gjithashtu kryeministrin Edi Rama për rëndimin e financave publike dhe për përjashtimin e tij nga Parlamenti. Në reagimin e tij, ai thekson se energjia e prodhuar nga këto termocentrale ka kushtuar rreth 675 euro për Megavat-orë, kundrejt 111 eurove në pikun e çmimeve të bursës, duke i cilësuar ato si dy karakatina lundruese që nuk i sjellin përfitime publike Shqipërisë.