Si e la Shqipëria pas Serbinë në negociatat me BE?

TIRANË — Kryetari i Grupit Parlamentar të Partisë Socialiste, Taulant Balla, ka deklaruar sot në mbledhjen e Komisionit për Europën dhe Punët e Jashtme se Shqipëria ka avancuar me ritme të shpejta në negociatat për anëtarësim në BE, duke lënë pas Serbinë — shtet që i hapi negociatat me Brukselin në janar 2014.

"Shqipëria jonë e përbashkët e të majtëve dhe të djathtëve, e socialistëve dhe demokratëve, është shumë përpara Serbisë. Sot flitet për dy vende pararojë nga rajoni ynë: Mali i Zi dhe Shqipëria", tha Balla, duke tërhequr vëmendjen se Mali i Zi i hapi negociatat në qershor 2012, ndërkohë që Shqipëria nisi bisedimet shumë më vonë.

Sipas Ballës, vendi ka arritur rekord historik në hapjen e kapitujve, duke përfituar edhe nga metodologjia e re e BE-së. "Janë identifikuar 92 hendeqe, të cilat po sheshohen për të shtruar autostradën e anëtarësimit", tha ai.

Balla nënvizoi se "një nga faktorët kryesorë" të këtij progresi mbetet Reforma në Drejtësi. Duke iu drejtuar opozitës dhe liderit të PD-së Sali Berishës, tha: "Nëse Shqipëria sot konsiderohet vend pararojë në BE, është Reforma në Drejtësi. Ne e kemi këtë avantazh me Serbinë dhe do ta ruajmë."

Vlerësimi i Shqipërisë si "vend pararojë" artikulohet nga mazhoranca socialiste, jo nga ndonjë vlerësim zyrtar i Komisionit Europian. Progresi në kapitujt 23-24, të lidhur me gjyqësorin dhe të drejtat themelore, mbetet parametri kyç i matur nga Brukseli para çdo date anëtarësimi.

Burim: ATSH
— Redaksia ZHURMA