Avokati i Popullit kërkon mekanizëm vendor për monitorimin e Speciales
Raporti i ri ex officio ngre shqetësime thelbësore për transparencën, paraburgimin dhe mungesën e kontrollit demokratik në Dhomat e Specializuara.
Redaksia ZHURMA · · 1 min lexim
Avokati i Popullit ka paraqitur gjetjet e raportit ex officio mbi punën e Dhomave të Specializuara dhe Zyrës së Prokurorit të Specializuar, ku është vënë theksi te mungesa e kontrollit demokratik nga institucionet e shtetit. Dokumenti i publikuar thekson se mungesa e një elementi vendor dhe e mbikëqyrjes institucionale dëmton standardet e një gjykimi të drejtë.
Gjatë tryezës ku u diskutua ky dokument, u përmendën gjithashtu shqetësime lidhur me kohëzgjatjen e paraburgimit, barazinë e palëve në proces, rregullat e pranueshmërisë së provave dhe monitorimin e komunikimeve. Për t'i dhënë zgjidhje këtyre sfidave, institucioni i Avokatit të Popullit i ka rekomanduar Kuvendit dhe Qeverisë angazhimin për ngritjen e një mekanizmi të pavarur e profesional, i cili do të përcillte nga afër ecurinë e procedurave gjyqësore në këtë gjykatë.
