Audacious Automotive prezanton modelin IV me bazë të Audi Quattro dhe motor V8

Kompania britanike Audacious Automotive ka prezantuar modelin IV, një interpretim modern të veturës Audi Quattro, i cili vjen me motor V8, fuqi deri në 750 kuaj fuqi dhe shpejtësi maksimale të pretenduar prej 322 km/h. Prodhimi i veturës do të jetë i kufizuar në vetëm 50 ekzemplarë, të cilët do të ndërtohen në Edinburg të Skocisë.

Modeli i ri ndërthur bazën mekanike të Audi RS4 B7, të prodhuar nga viti 2006 deri në vitin 2008, me dizajnin e Quattro-s me bazë të shkurtër të rrotave. Ndonëse Audi Quattro njihet historikisht për motorin me pesë cilindra, ndërtuesit kanë përzgjedhur motorin V8 4.2-litërsh të RS4 si bazë teknike. Sipas kompanisë, ky motor garanton barpeshën e duhur mes performancës moderne dhe përvojës tradicionale të ngasjes.

Blerësit mund të zgjedhin ndërmjet karrocerisë origjinale dhe një karrocerie të re prej fibrash karboni, ku kjo e fundit pritet të mbulojë rreth 80 për qind të prodhimit total. Sa i përket peshës, variantet me karroceri origjinale peshojnë nga 1.400 deri në 1.450 kilogramë, ndërsa ato prej fibrash karboni ulen në rreth 1.200 kilogramë. Dizajni i jashtëm merr frymëzim nga Audi Quattro i Grupit B në garat rally si dhe nga modeli Audi 90 IMSA GTO, ndërsa pjesa e brendshme ruan një stil minimalist dhe analog. Veturat do të ofrohen në katër konfigurime motorike me transmision manual me gjashtë shpejtësi. Versioni fillestar zhvillon 600 kuaj fuqi, ndërsa paketa Stage Two e ngre fuqinë në 750 kuaj fuqi përmes përforcimeve të brendshme dhe përmirësimeve në ftohje e furnizim me karburant, me me një nga versionet që arrin deri në 10 mijë rrotullime në minutë.

Procesi i prodhimit nga porosia deri te përfundimi i veturës mund të zgjasë rreth tre vjet, ndërsa dërgesat e para pritet të nisin në fund të vitit të ardhshëm. Çmimi fillestar është caktuar në 350 mijë funte, pa përfshirë TVSH-në, veturën donatore, transportin, regjistrimin dhe pajisjet shtesë.