Ministria e Arsimit financon 23 projekte shkencore dhe dy laboratorë mjedisorë
Ministrja Mirela Kumbaro e njoftoi gjatë Ditës Botërore të Mbrojtjes së Natyrës, përmes Agjencisë Kombëtare të Kërkimit Shkencor dhe Inovacionit.
TIRANË — Ministria e Arsimit do të financojë gjatë vitit 2026 ndërtimin e dy laboratorëve kërkimorë dhe 23 projekte shkencore, të fokusuara në mbrojtjen e biodiversitetit, monitorimin e ekosistemeve, menaxhimin e qëndrueshëm të burimeve natyrore dhe zhvillimin e teknologjive të gjelbra, përmes Agjencisë Kombëtare të Kërkimit Shkencor dhe Inovacionit.
Në Ditën Botërore të Mbrojtjes së Natyrës, ministrja e Arsimit, Mirela Kumbaro, theksoi rëndësinë e kërkimit shkencor dhe inovacionit në funksion të mbrojtjes së mjedisit. "Ky është një angazhim konkret për ta vendosur kërkimin shkencor dhe inovacionin në shërbim të mjedisit dhe zhvillimit të qëndrueshëm", u shpreh ajo.
Financimi i laboratorëve dhe projekteve synon të mbështesë kapacitetet shkencore e inovative në fusha të lidhura me mbrojtjen e natyrës, përdorimin e qëndrueshëm të burimeve dhe përballimin e sfidave mjedisore.
Burim: ATSH
— Redaksia ZHURMA