Arrestohet zyrtari në Prilep për ryshfet prej 18.000 denarësh
Zyrtari kishte premtuar qytetarit se do t'i hiqej ndihma sociale nëse nuk pranonte trajnimin
PRILEP — Një zyrtar i punësuar në Qendrën e Punësimit në Prilep është arrestuar nga policia për ryshfet në vlerë prej 18.000 denarësh. Sipas Prokurorisë, zyrtari kishte kërkuar paratë nga një banor i fshatit Belo Pole, duke i premtuar se do ta ndihmonte të mos humbte të drejtën e ndihmës sociale dhe se do ta regjistronte gruan e tij si kërkuese aktive të punës.
Zyrtari dyshohet se i ka thënë qytetarit se, nëse refuzonte trajnimin, do t'i hiqej ndihma sociale. Për të shmangur këtë, ai i kërkoi t'i paguante gjysmën e shumës së ndihmës sociale, përkatësisht 6.000 denarë në muaj.
Prokuroria njofton se zyrtari gjithashtu i premtoi se do ta regjistronte gruan e tij në sistemin elektronik të Agjencisë si kërkuese aktive të punës, edhe pse ajo nuk kishte kartelë kontrolli dhe nuk paraqitej rregullisht në Qendrën e Punësimit.
Policia e arrestoi të dyshuarin më 24 korrik, gjatë dorëzimit të këstit të fundit prej 6.000 denarësh. Gjatë aksionit, te zyrtari u gjetën dhe u sekuestruan kartëmonedhat e shënuara, pas së cilës ai u ndalua menjëherë.
Burim: Shenja — Redaksia ZHURMA