Arrestohet 37-vjeçari në Roskovec pasi qëlloi me armë te banesa e ish-bashkëjetueses
Policia e Roskovecit arrestoi një 37-vjeçar pasi dyshohet se qëlloi me armë zjarri para banesës së ish-bashkëjetueses së tij në fshatin Luar.
Redaksia ZHURMA · · 1 min lexim
Një 37-vjeçar është vënë në pranga nga autoritetet policore pas një operacioni të përbashkët mes shërbimeve të Stacionit të Policisë Roskovec dhe Komisariatit të Policisë Fier. I dyshuari, i identifikuar si Besmir (Erjon) Mustaj, u arrestua pasi dyshohet se ka qëlluar me armë zjarri për motive të dobëta përpara banesës ku jetonte ish-bashkëjetuesja e tij në fshatin Luar.
Uniformat blu reaguan menjëherë pas marrjes së njoftimit për të shtëna në zonë, duke organizuar veprimet e shpejta hetimore që çuan në identifikimin dhe kapjen e autorit të dyshuar. Sipas njoftimeve zyrtare, materialet procedurale i janë referuar tashmë Prokurorisë për veprime të mëtejshme ligjore.
Ndaj të arrestuarit rëndojnë disa akuza penale, përfshirë veprat për mbajtjen pa leje dhe prodhimin e armëve, armëve shpërthyese dhe municionit, dhunën në familje, si dhe veprimet në kundërshtim me vendimin e gjykatës. Hetimet vijojnë për dokumentimin e plotë të rrethanave të ngjarjes.
