Rrahën policin dhe djalin e tij në Llapushnik — ndalohen tre persona
Ngjarja ndodhi mbrëmjen e së mërkurës pas një mosmarrëveshjeje në komunikacion midis drejtuesve të dy veturave.
DRENAS — Tre persona janë ndaluar për 48 orë nën dyshimin se sulmuan fizikisht një zyrtar policor jashtë detyrës dhe djalin e tij, pas një mosmarrëveshjeje në komunikacion. Ngjarja ndodhi mbrëmjen e së mërkurës në rrugën "Islam Syle Topalli" në fshatin Llapushnik të Drenasit.
Sipas burimeve, zanafilla e konfliktit nisi kur djali i policit, i cili po drejtonte një veturë Audi Q3, pati një mosmarrëveshje me drejtuesin e një Volkswagen Pickup, Dritëro Krasniqin. Pas një debati verbal në rrugë, situata eskaloi në dhunë fizike mes palëve.
Në këtë përleshje u përfshinë edhe dy të dyshuar të tjerë, Labinot Krasniqi, shtetas gjerman dhe vëllai i Dritëros, si dhe Liberon Krasniqi. Polici dhe djali i tij morën lëndime të lehta trupore dhe u trajtuan në Qendrën Kryesore të Mjekësisë Familjare në Drenas.
Prokurori ka urdhëruar ndalimin e të tre të dyshuarve për 48 orë nën dyshimin për "Lëndim të lehtë trupor". Rastin e konfirmuan organet e ndjekjes, të cilat po i zhvillojnë hetimet në procedurë të shpejtë për të zbardhur rrethanat e incidentit.
Burim: Sinjali
— Redaksia ZHURMA
