Si ndodhi pengmarrja dhe dhunimi i një 36-vjeçari në Shkup?
Tre persona nga Gërçeci janë arrestuar pasi akuzohen se i prenë rrugën dhe morën peng një person në Karposh duke i shkaktuar lëndime të rënda trupore.
SHKUP — Zyrtarët policorë të SPB Shkup kanë arrestuar tre persona nga Gërçeci i Sarajit, të dyshuar për dhunë dhe rrëmbim. Të arrestuarit janë R.B. (45), M.B. (36) dhe B.B. (34), të cilët akuzohen se i kanë prerë rrugën një 36-vjeçari me iniciale D.E. nga fshati Semenisht.
Sipas denoncimit në polici, autorët bllokuan mjetin e viktimës tip “Mercedes” duke përdorur tri makina të markave “Hyundai”, “Volkswagen Tiguan” dhe “Volkswagen Passat”. Më pas, i dyshuari R.B. e ka sulmuar fizikisht 36-vjeçarin, duke i shkaktuar lëndime të rënda trupore në mes të Karposhit.
Pasi e dhunuan, të dyshuarit e futën viktimën në makinën e tyre, duke e dërguar në një autoplac në Karposh dhe më pas e lanë në fshatin Shishovë. Pas lokalizimit nga policia, të tre personat u arrestuan më 13 qershor dhe ndaj tyre do të dorëzohet kallëzim penal. Zbardhja e shpejtë e rastit tregon se autorët nuk arritën t'i shpëtonin ndjekjes policore pas një sulmi të organizuar në rrugë.
Burim: Almakos
— Redaksia ZHURMA