Çfarë iu kap dy të arrestuarve për armë e drogë në Vlorë?
Policia e Vlorës ka vënë në pranga një 33-vjeçar me precedent penal dhe një 18-vjeçar në Dhërmi, të cilëve u sekuestroi armë, municion dhe doza kokaine.
VLORË — Policia e Vlorës, në bashkëpunim me shërbimet e Forcës së Posaçme Operacionale, ka finalizuar operacionin e koduar "Siguria", duke arrestuar dy persona në qytetin bregdetar dhe në Dhërmi. Gjatë këtij aksioni të fokusuar te siguria e sezonit turistik, uniformat blu sekuestruan një armë zjarri pistoletë, municione dhe dhjetëra doza narkotikësh.
I arrestuari i parë është shtetasi T. P., 33 vjeç, banues në Vlorë. Ky person, i cili rezulton me precedentë penalë të mëparshëm në fushën e narkotikëve, u kap pasi gjatë kontrolleve në automjet dhe në banesën e tij u gjetën një pistoletë, një krehër arme, 44 fishekë luftarakë dhe një sasi kokaine e ndarë në doza gati për shitje.
Ndërkohë, në Dhërmi u arrestua shtetasi 18-vjeçar A. C., po ashtu banues në Vlorë. Sipas njoftimit zyrtar të policisë, ky i ri u kap në flagrancë me sasi lëndësh narkotike të llojit kokainë dhe cannabis sativa, të cilat dyshohet se i posedonte me qëllim shitjen e tyre në zonën e plazhit dhe në qytet.
Të gjitha materialet procedurale për këtë operacion tashmë i janë referuar Prokurorisë pranë Gjykatës së Shkallës së Parë të Jurisdiksionit të Përgjithshëm Vlorë për veprime të mëtejshme. Policia konfirmon se kontrollet intensive në mbarë qarkun do të vazhdojnë med synim garantimin e sigurisë publike dhe mbarëvajtjen e sezonit.
Burim: Almakos
— Redaksia ZHURMA