Ardit Gjebrea paraqitet në Prokurorinë e Posaçme Antikorrupsion

Moderatori dhe producenti i njohur televiziv, Ardit Gjebrea, është paraqitur paraditen e kësaj të premteje në ambientet e Prokurorisë së Posaçme Antikorrupsion (SPAK). Sipas burimeve, artisti ka hyrë i vetëm në godinën e institucionit rreth orës 10:00 të mëngjesit.

Deri më tani nuk dihen arsyet e thirrjes së tij dhe mbetet e paqartë nëse ai është thirrur në cilësinë e personit që ka dijeni për ndonjë çështje, nën hetim, apo për ndonjë procedurë tjetër. Vetë institucioni i akuzës nuk ka dhënë ende ndonjë njoftim zyrtar mbi arsyet e pranisë së kantautorit atje.