Arben Gashi kërkon që LDK-ja të mos ketë vija të kuqe

PRISHTINË — Deputeti i zgjedhur i Lidhjes Demokratike të Kosovës, Arben Gashi, ka deklaruar se kjo parti nuk duhet të ndërtojë politikën e saj mbi vija të kuqe apo ekskluzivitete ndaj subjekteve të tjera politike. Ky qëndrim u shpreh pas njoftimit zyrtar për caktimin e seancës konstituive më 6 gusht.

Sipas Gashit, ky moment kërkon përgjegjësi shtetërore, vizion dhe lidership politik. Deputeti theksoi se LDK-ja duhet të marrë rolin e saj si forcë udhëheqëse e qendrës së djathtë, duke u udhëhequr nga orientimi euroatlantik dhe interesi i vendit për të pasur institucione të forta e funksionale.

Për të ndryshuar vendin, ai kërkon që fillimisht të definohet qartë vetë partia. Gashi bëri thirrje për një subjekt modern, meritokratik dhe autentik, i cili mund të rikthejë besimin e qytetarëve përmes një identiteti të pastër dhe me guxim për të udhëhequr zhvillimin dhe stabilitetin.

Aktualisht, LDK-ja i ka pezulluar bisedimet me Lëvizjen Vetëvendosje për arritjen e një marrëveshjeje të mundshme qeverisëse. Ky vendim vjen pas deponimit të nënshkrimeve për nismën e shkarkimit të kryetarit të partisë, Lumir Abdixhiku, gjë që ka tensionuar proceset e brendshme dhe negociatat.

Burim: Gazeta Metro
— Redaksia ZHURMA