Çfarë thotë Ananas Impex për specin me pesticide?

PRISHTINË — Kompania Ananas Impex SH.P.K. ka reaguar ndaj njoftimit të Agjencisë së Ushqimit dhe Veterinarisë (AUV) për ndalim të një ngarkese me spec të kuq, duke deklaruar se sasia e raportuar e kontaminuar me pesticidin Carbofuran nuk është gjetur dhe nuk është shpërndarë në tregun e Kosovës.

Në deklaratën publike, kompania theksoi se ka bashkëpunuar "ngushtë dhe në mënyrë transparente" me AUV-në, duke realizuar gjurmueshmërinë e plotë të lotit të raportuar përmes sistemit RASFF. Sipas saj, kontrollet zyrtare të AUV-së në objektet e kompanisë dhe në terren "nuk kanë evidentuar asnjë parregullsi apo bazë për ndërmarrjen e masave ndaluese".

Ananas Impex u thirr në procesverbalin zyrtar të lëshuar nga AUV pas inspektimeve, duke shtuar se analizat laboratorike të produkteve dhe lotëve përkatës kanë rezultuar "në përputhje të plotë me standardet, pa prezencë të pesticideve mbi kufijtë e lejuar". Kompania pret sqarim përfundimtar zyrtar nga AUV për të konfirmuar gjetjet.

Burim: Telegrafi
— Redaksia ZHURMA