Analistët: Partitë hyjnë në fushatë pa programe, me akuza të së kaluarës

PRISHTINË — Më pak se tri ditë para nisjes së fushatës zyrtare për zgjedhjet e parakohshme parlamentare të 7 qershorit, skena politike në Kosovë po dominohet nga akuza të ndërsjella ndaj qeverisjeve të kaluara, ndërsa mungojnë programet konkrete dhe vizionet për të ardhmen, vlerësojnë analistët.

Në emisionin "Debat Plus", analisti Imer Mushkolaj deklaroi se fushata po zhvillohet kryesisht rreth debatit për të kaluarën. "Deri tash, për fat të keq, shumica e fushatës zgjedhore po karakterizohet me të kaluarën. Po provohet se qysh me lënë tjetrin fajtor për të kaluarën, jo për të ardhmen", tha ai. Mushkolaj shtoi se nuk ka parë "ide më të strukturuara, programe e vizione" dhe se periudha e shkurtër katërmujore nga zgjedhjet e fundit nuk lë hapësirë për premtime të reja. Ai kritikoi edhe takimet elektorale në Kosovë dhe diasporë, duke i cilësuar si të dëmshme për debatin demokratik.

Analisti Ylli Hoxha, nga ana tjetër, ka kritikuar premtimet elektorale për pagën e 13-të dhe të 14-të. Ai sqaroi se paga e 13-të nënkupton një pagë shtesë brenda 12 muajve, ndërsa paga e 14-të përbën rritje të të hyrave të punëtorëve për rreth 18 për qind. "Këto oferta publike, si premtimi për rritje 50% apo premtime të tjera, janë në shpërputhje me ligjin që është aprovuar rishtazi, por edhe me mundësitë reale", deklaroi Hoxha, duke shtuar se pagat "nuk do të duhej të ishin lëmoshë mes votuesit dhe përfaqësuesit qeveritar".

Hoxha vlerësoi se debati politik po rrëshqet drejt populizmit dhe "tallavares politike", ku fokusi kryesor mbeten premtimet financiare për qytetarët. Zgjedhjet e 7 qershorit do të jenë të tretat parlamentare brenda 18 muajsh, pasi Kuvendi nuk arriti të zgjedhë presidentin e ri brenda afateve kushtetuese.

Burim: Lajmi.net
— Redaksia ZHURMA