Ambasada italiane: Mungesa e konsultimeve për Ligjin e Speciales cenon sundimin e ligjit

Ambasada e Italisë ka shprehur shqetësimin e saj lidhur me mundësinë që Kuvendi i Kosovës të votojë ndryshimet në Ligjin për Dhomat e Specializuara. Sipas ambasadës, amendamentet e propozuara ngrenë shqetësime serioze për përmbushjen e zotimeve ndërkombëtare të vendit dhe respektimin e parimeve themelore të sundimit të ligjit.

Në reagimin publik theksohet se çështjet që ngjallin shqetësim përfshijnë pavarësinë e gjyqësorit, mbrojtjen e viktimave dhe dëshmitarëve, vazhdimësinë e të drejtave procedurale, llogaridhënien efektive dhe kushtetutshmërinë e ndryshimeve. Që nga kthimi i ligjit për rishqyrtim në Kuvend, autoritetet italiane kanë përcjellë pritshmëritë e tyre te autoritetet e Kosovës, duke kërkuar konsultime paraprake që nuk janë zhvilluar ende. Ambasada ka vlerësuar se ligji në formën aktuale nuk u shërben interesave të Kosovës dhe as individëve të dënuar së fundmi nga Dhomat e Specializuara.