Çfarë përfaqëson AlbArt, festivali shqiptar i arteve të diasporës në Brescia?
Festivali ndërkombëtar mirëpret për herë të parë në Itali artet e emigrantëve shqiptarë, duke fokusuar në atë që do të thotë të krijosh në një gjuhë tjetër.
BRESCIA — Nga 26 deri më 28 qershor, qyteti i Brescia-s në Itali do të mirëpresë edicionin e parë të AlbArt, Festival Ndërkombëtar i Teatrit dhe Arteve Performuese. Festivali është organizuar nga Qendra Kulturore ODA, një shoqate kulturore e përbërë nga qytetare shqiptare dhe italianë, dhe ideuar nga regjisorja shqiptare Valbona Xibri.
Qendra Kulturore ODA ka si qëllim lartësimin e vlerave të artit dhe kulturës shqiptare në Itali, si dhe promovimin e artistëve që krijojnë dhe veprojnë në diasporë. Përmes AlbArt synon të forcojë dialogun kulturor dhe të krijojë ura bashkëpunimi mes Shqipërisë, Italisë dhe skenës ndërkombëtare.
Për herë të parë në Itali, një festival vendos në qendër punën e artistëve të skenës teatrore në diasporë, duke krijuar një hapësirë takimi mes kulturave, gjuhësh, identitetesh dhe praktikave artistike nga gjithë Europa. Ky projekt përfaqëson një nismë unike në peizazhin kulturor italian.
AlbArt lind nga një pyetje e thjeshtë dhe e thellë: çfarë do të thotë të krijosh personazhe në një gjuhë tjetër nga gjuha amtare? Kjo pyetje përshkon përvojën e shumë artistëve emigrantë dhe përbën fokusin teorik të edicionit të parë të festivalit.
Përmes shfaqjeve, takimeve publike, workshopeve dhe momenteve të diskutimit, AlbArt ofron një vështrim origjinal mbi format e reja të krijimit artistik që lindin nga takimi mes kulturave, gjuhëve dhe rrugëve të emigracionit. Festivali synon të jetë më shumë se një ngjarje kulturore.
Ndër momentet e rëndësishme të festivalit, një vend të veçantë do të zërë takimi publik mbi identitetin dhe perspektivat e ardhshme të teatrit të diasporës. Në këtë aktivitet do të përshëndesë edhe një përfaqësues i organizatës "Regjisoret ballafaqohen", e vetmja shoqatë italiane për regjisorët e teatrit.
Prania e kësaj organizate përbën një njohje të rëndësishme për festival që synon të krijojë ura mes përvojave të reja artistike të diasporës dhe sistemit kulturor italian. AlbArt shikon drejt të ardhmes dhe synon të bëhet një pikë reference ndërkombëtare për teatrin dhe artet performuese të diasporës.
Burim: BalkanWeb
— Redaksia ZHURMA
