Çfarë kërkojnë aktivistët e "Stop për Usje" për lejen e çimentores?

SHKUP — Aktivistë ekologjikë nga iniciativa "Stop për Usje" dhe qytetarë marshuan mbrëmjen e së hënës nga Kuvendi i Maqedonisë së Veriut deri te Ministria e Mjedisit Jetësor dhe Planifikimit Hapësinor, duke kërkuar që vendimi për rinovimin e lejes A të integruar për fabrikën e çimentos "Usje" të merret sipas standardeve evropiane të mbrojtjes së mjedisit.

Protestuesit mbajtën mesazhe si: "Jo leje e re me rregulla të vjetra", "Shëndeti para fitimit" dhe "Shkupi i qytetarëve, jo i industrisë". Organizatorët kanë zhvilluar aktivitete të ngjashme kundër ndotjes së ajrit edhe në muajt e kaluar.

Kërkesa për rinovimin e lejes u dorëzua dhe u publikua më 22 maj në faqen e ministrisë. Afati njëmujor për shqyrtimin e dokumentacionit dhe paraqitjen e vërejtjeve përfundoi më 22 qershor. Ministri Muamet Hoxha deklaroi se në javën e parë të korrikut do të mbahet debat publik për çështjen.

Hoxha sqaroi se procedura zhvillohet sipas ligjit aktual, por leja do të rinovohet duke marrë parasysh Ligjin e ri për kontrollin e emetimeve industriale, që pritet të hyjë në fuqi në shtator 2027 dhe parasheh standarde më të rrepta. Ministri njoftoi gjithashtu se po përgatitet një regjistër i kapaciteteve industriale me leje A të integruar, ku operatorët do të kenë detyrim të raportojnë matjet që ministria do t'i publikojë.

Burim: Tetova Sot
— Redaksia ZHURMA