Ngrihet aktakuzë ndaj gjashtë personave për barrikadat në veri

PRISHTINË — Prokuroria Speciale e Kosovës ka ngritur aktakuzë ndaj gjashtë personave për vendosjen e barrikadave në veri në dhjetor 2022. Sipas dosjes së siguruar nga mediat vendore, të akuzuarit ngarkohen për organizimin e grupeve të armatosura që krijuan pozicione luftarake me eksploziv dhe thasë rëre.

Në krye të këtij grupi kriminal, sipas prokurorisë, ishte Milan Radoiçiç, i cili organizoi strategjinë e bllokimit dhe monitorimin e Policisë së Kosovës. Hetimet ndaj tij dhe dhjetë personave të tjerë janë pezulluar përkohësisht nga organet e ndjekjes, pasi ata mbeten të paarritshëm për drejtësinë.

Dokumenti zyrtar i prokurorisë zbulon se të gjithë të akuzuarit kanë një të kaluar të pasur kriminale, ndonëse vetëm dy prej tyre kanë dënime të formës së prerë. Mes tyre spikat Dushan Maksimoviq, i dënuar rishtazi me 30 vjet burgim për sulmin e armatosur terrorist në Banjskë.

I akuzuari Milos Radosavjleviq ishte i përfshirë në procesin e Banjskës si dëshmitar që kishte mbrojtur Maksimoviqin. Ndërkaq, Dusan Drobaq ka dënim të formës së prerë prej 18 muajsh burgim dhe 15 mijë euro gjobë për pjesëmarrje në protestën e dhunshme ndaj forcave të KFOR-it në Zveçan.

Nenad Orloviq, i akuzuari tjetër në këtë grup, ishte dënuar më parë për kalim ilegal të kufirit Kosovë-Serbi në dy raste të ndryshme. Ai dyshohet si një nga figurat kryesore që drejtonte kamionët e barrikadave në dhjetor të vitit 2022, të cilët sipas prokurorisë përmbajtën lëndë shpërthyese.

Në aktakuzë përdoren edhe pamje të ndryshme mediatike ku Orloviq shihet qartë duke larguar kamionët që mbartnin eksploziv. Prokurorët theksojnë se këto bllokada nuk ishin revoltë e thjeshtë qytetare, por pozicione ofensive ushtarake të krijuara për të sulmuar forcat e rendit në rast të ndonjë ndërhyrjeje.

Gjykimi ndaj të akuzuarve pritet të fillojë së shpejti para organeve të drejtësisë në Prishtinë. Ky rast i ri dëshmon për një vazhdimësi të aktiviteteve kriminale që lidhin barrikadat e dhjetorit me ngjarjet e mëvonshme në Banjskë, të cilat synonin destabilizimin e plotë të veriut të Kosovës.

Burim: Demokracia
— Redaksia ZHURMA