Si përfundoi në kanal autobusi turistik në Ishull-Shëngjin?
Mjeti po lëvizte në një rrugë dytësore për të shmangur trafikun e rënduar, ku devijimi për të shmangur një përplasje rezultoi me rënien në kanal.
LEZHË — Një autobus i një agjencie turistike ka dalë nga rruga dhe ka përfunduar në një kanal në zonën e Ishull-Shëngjinit mesditën e së shtunës. Sipas të dhënave të para, mjeti po kthehej nga Shëngjini dhe drejtuesi kishte zgjedhur një rrugë dytësore me qëllim shmangien e trafikut të rënduar në dalje të zonës bregdetare.
Gjatë lëvizjes në një segment të ngushtë rrugor, shoferit i ka ardhur përballë një automjet tjetër. Për të parandaluar përplasjen e drejtpërdrejtë me të, ai ka devijuar menjëherë drejt skajit të rrugës, por si pasojë autobusi ka rrëshqitur duke rënë në kanalin anësor.
Në momentin e aksidentit në autobus nuk kishte pasagjerë, por vetëm anëtarë të stafit të agjencisë, të cilët kanë dalë pa pësuar lëndime. Policia rrugore ka nisur hetimet për zbardhjen e plotë të shkaqeve të këtij incidenti që shënoi vetëm dëme materiale.
Burim: ABC News
— Redaksia ZHURMA