Akordet e Kosovës: Sonte nata finale dhe ndarja e çmimeve

Festivali i Këngës në RTK “Akordet e Kosovës” mbyll sonte edicionin e katërt me natën finale në palestrën “1 Tetori” në Prishtinë, ku do të shpallen fituesit dhe do të ndahen çmimet kryesore. Ngjarja nisi mbrëmë me pjesëmarrjen e 17 solistëve garues, të cilët u paraqitën para publikut me performanca në zhanre të ndryshme nga rock-u alternativ, etno-pop-i dhe xhazi, deri te baladat. Përveç garës së rriturve, edicioni i këtij viti do të përmbyllet me një risi, pasi nesër për herë të parë do të mbahet edhe festivali i fëmijëve.

Në natën përmbyllëse të këtij manifestimi muzikor, përveç ndarjes së tri çmimeve kryesore, çmimit të orkestrës dhe atij për tekstin më të mirë, në skenë do të performojnë edhe artistë të njohur si Bojken Lako, Besnik Çaka, Deniza Begolli dhe Sejat Jakupi. Festivali po transmetohet drejtpërdrejt në RTK, në Radiotelevizionin Shqiptar dhe në kanalin e gjuhës shqipe të Radiotelevizionit të Maqedonisë së Veriut. Ndërkohë, drejtori artistik i festivalit, Florent Boshnjaku, ka vlerësuar se rikthimi i këtij emri historik shënon një fillim të ri dhe një mundësi për ruajtjen e trashëgimisë muzikore.

Organizimi i këtij viti pëjëll edhe synimin e transmetuesit publik për ta dërguar fituesin në Eurovision. Drejtoresha e Përgjithshme e RTK-së, Zana Spahiu, ka bërë të ditur se është dërguar një kërkesë dhe ka nisur lobimi pranë Unionit Evropian të Transmetuesve. Ajo është shprehur optimiste, por ka pranuar se statuti aktual i EBU-së ende nuk e lejon Kosovën të jetë pjesë e këtij mekanizmi.