AKK kundërshton ligjin për pronën publike — cenon autonominë lokale

— Me datë 23 korrik 2026, Asociacioni i Komunave të Kosovës (AKK) ka dhënë një reagim të fortë kundër Projektligjit për Pronën Publike, duke paralajmëruar se dispozitat e tij cenojnë autonominë lokale dhe krijojnë bazë për centralizimin e kompetencave në nivelin qendror.
— Në reagimin e saj, AKK thekson: “Projektligji për Pronën Publike paraqet një tendencë shqetësuese të centralizimit të kompetencave dhe cenon një nga shtyllat themelore të vetëqeverisjes lokale, atë të drejtën e komunave për të poseduar, administruar dhe menaxhuar pronën e tyre”.
— Asociacioni vlerëson se projektligji bie ndesh me Ligjin për Vetëqeverisjen Lokale, konkretisht me nenin 14, i cili u garanton komunave të drejtën për të administruar pronën e luajtshme dhe të paluajtshme, dhe nuk është në përputhje as me Kartën Evropiane të Vetëqeverisjes Lokale, e cila garanton autonominë dhe mbrojtjen e kompetencave të pushtetit lokal.
— Sipas AKK-së, nëse projektligji miratohet në formën aktuale, komunave mund t’u kufizohet ndjeshëm e drejta për të menaxhuar asetet e tyre, ndërsa niveli qendror do të fitojë kontroll më të madh mbi pronat që shërbejnë për zhvillimin ekonomik dhe projektet me interes publik.
— AKK rikujton se prona komunale nuk është vetëm një aset administrativ, por një instrument kyç për zhvillimin lokal: përmes saj komunat planifikojnë zhvillimin urban, krijojnë zona ekonomike, tërheqin investime dhe realizojnë projekte infrastrukturore si ndërtimi i shkollave, çerdheve, qendrave shëndetësore, rrugëve, objekteve sportive dhe kulturore.
— Po ashtu, asociacioni shpreh shqetësimin se komunat tashmë përballen me barrë të shtuar financiare si pasojë e vendimeve të nivelit qendror, ndërsa kufizimi i kompetencave mbi pronën do ta vështirësonte edhe më tej funksionimin e tyre.
— Në fund, AKK i ka bërë thirrje Qeverisë së Kosovës që të mos procedojë me miratimin e projektligjit pa një dialog të mirëfilltë me komunat dhe pa harmonizimin e tij me Ligjin për Vetëqeverisjen Lokale dhe Kartën Evropiane të Vetëqeverisjes Lokale.
— “Autonomia lokale nuk është privilegj i komunave, por garanci kushtetuese për qytetarët. Mbrojtja e pronës komunale është mbrojtje e decentralizimit, e zhvillimit ekonomik lokal dhe e një shteti demokratik ku kompetencat respektohen në çdo nivel të qeverisjes”, thuhet në reagimin e AKK-së.
— Burim: Lajmi.net

— Redaksia ZHURMA