AUV mbyll 12 lokale ushqimore në Gostivar — shqipton 30 gjoba

GOSTIVAR — Agjencia e Ushqimit dhe Veterinarisë (AUV) e Maqedonisë së Veriut ka ndaluar përkohësisht punën e 12 operatorëve ushqimorë dhe ka shqiptuar 30 gjoba në një shumë totale prej 7.750 eurosh në kundërvlerë në denarë, pas 70 kontrolleve të jashtëzakonshme të realizuara në rajonin e Gostivarit.

Shkaqet e ndëshkimeve ishin moszbatimi i masave të dezinfektimit dhe deratizimit te 5 operatorë, si dhe moszbatimi i ekzaminimeve shëndetësore të detyrueshme për punonjësit te 18 operatorë. AUV gjeti edhe 11 subjekte të paregjistruara si operatorë ushqimorë, të cilave iu ndalua përkohësisht aktiviteti deri në regjistrim.

Gjatë kontrolleve u hasën edhe dy operatorë duke shitur ushqim jo të sigurt, në sasi 18 kilogramësh — salçiçe, kos, jogurt, sallamë dhe gjalpë. Nën shënjestër ishin operatorë të ushqimit si kafeteritë, piceritë, furrat e bukës, pastiçeritë, qebaptoret dhe objektet e paketimit të frutave e perimeve.

Kontrollet verifikuan gjithashtu nëse operatorët respektonin ndalimin e miratuar nga AUV-ja për mospërdorimin e ujit nga sistemi i furnizimit me ujë të Gostivarit, por nuk u gjet asnjë parregullsi në këtë drejtim. Nga 70 kontrollet, shkeljet e identifikuara lidheshin kryesisht me higjienën, kontrollet shëndetësore dhe regjistrimin e operatorëve — jo me përdorimin e ujit.

Burim: Shenja
— Redaksia ZHURMA