Ademi bisedon me tre kosovarë të Bayern Munich për kombëtaren
Ibrahimovici, Osmani dhe Gashi luajnë për Bayern Munich në Bundesliga
PRISHTINË — Kryetari i Federatës së Futbollit të Kosovës, Agim Ademi, ka bërë me dije se është në bisedime me tre futbollistë që luajnë te Bayern Munich në Bundesliga. Bëhet fjalë për Arijon Ibrahimovicin, Yll Gashin dhe Erblin Osmanin.
Ademi ka thënë se është në kontakt edhe me dy yje të tjerë për t'i afruar te Kosova. Ai u takua para disa ditësh me Ibrahimovicin në qytetin e Prizrenit, teksa me Erblin Osmanin ishte takuar javë më parë.
Ibrahimovici u rikthye këtë verë nga huazimi njëvjeçar te Heidenheimi në Bundesliga, teksa trajneri i Bayernit, Vincent Kompany ka bërë me dije se ai do të integrohet në ekipin e parë sivjet. Ai ka kontratë me Bayernin deri në qershor të vitit 2028.
Erblin Osmani, 17-vjeçar është pjesë e akademisë së klubit gjerman, mirëpo debutoi me ekipin e parë në mars të këtij viti, në Bundesliga, në fitoren e Bayernit ndaj Union Berlinit. Ai luajti për pak minuta, teksa u bë lojtari i dytë më i ri që debuton me fanellën bavareze.
Yll Gashi, 18-vjeçar më 2 korrik e vazhdoi kontratën me Bayernin deri në vitin 2028. Kombëtarja e Kosovës rikthehet në aksion në muajin shtator, kur më 24 shtator do të jetë nikoqire e Republikës së Irlandës në "Fadil Vokrri".
Burim: Gazeta Express
— Redaksia ZHURMA