Adelina Ismaili këndon në Ostros më 11 gusht — organizon LD-ja në Mal të Zi
Manifestimi i organizuar nga Lidhja Demokratike në Mal të Zi mbahet më 11 gusht dhe do të sjellë edhe artistë vendorë.
OSTROS — Këngëtarja Adelina Ismaili do të performojë në manifestimin tradicional "Vera në Krajë", i cili organizohet më 11 gusht në Ostros të Malit të Zi. Ky aktivitet i përvitshëm organizohet nën patronazhin e subjektit politik Lidhja Demokratike në Mal të Zi.
Sipas organizatorëve, ky manifestim pasqyron lidhjen e hershme historike me Lidhjen Demokratike të Kosovës të themeluar nga ish-presidenti Ibrahim Rugova. Përfaqësuesit e partisë theksojnë se fryma rugoviane ka pasur një jehonë të jashtëzakonshme në Krajë që prej viteve të nëntëdhjeta.
Përveç performancës kryesore të Adelina Ismailit, në skenën e hapur do të ngjiten edhe artistë të shumtë vendorë. Ndër ta spikat Simon Shkreli, recitimet e të cilit synojnë të zgjojnë krenarinë, kujtesën historike dhe ndjenjën e dashurisë për kombin ndër shqiptarët e zonës.
Partia organizatore u ka bërë thirrje qytetarëve që të marrin pjesë masivisht në këtë mbrëmje festive në Ostros. Sipas tyre, qëllimi mbetet bashkimi dhe ruajtja e trashëgimisë sonë përmes këngës e kulturës shqiptare nën frymën e unitetit.
Burim: Ulcinj info
— Redaksia ZHURMA
