Ymeri: Propaganda dhe gjendja ekonomike po dërgojnë qytetarët në protesta

Deputetja e Lidhjes Demokratike të Kosovës (LDK), Janina Ymeri, ka deklaruar se protestat shprehin gjendjen e rëndë ekonomike dhe mënyrën se si po qeveriset vendi. Ajo ka theksuar se tubimet e tilla nuk duhet të shihen si garë për të numëruar pjesëmarrësit, por si thirrje e qytetarëve kundër politikave të ekzekutivit.

Ymeri ka kritikuar pushtetin për mungesë besimi te qytetarët dhe propagandë, duke veçuar ndërhyrjet në krijimtarinë artistike, premtimet për investime dhe mungesën e respektit ndaj bujqve. Ndër të tjera, ajo ka përmendur rastet e vdekjeve që sipas saj lidhen me papërgjegjësinë e Qeverisë, si dhe paralajmërimet për shtrenjtimin e energjisë elektrike. Deputetja ka shtuar se mbështet protestat paqësore dhe se largimi i pushtetit aktual mbetet i pashmangshëm për një Kosovë më të zhvilluar.