Ymeri: Kalimi nga dhuna e rrugës në zyra nuk ishte përvojë e mirë për Kosovën

Deputetja e Lidhjes Demokratike të Kosovës (LDK), Janina Ymeri, ka adresuar kritika të forta ndaj kryeministrit Albin Kurti dhe bashkëpunëtorëve të tij, duke deklaruar se protestat e dhunshme në vend u shndërruan në modelin që i solli ata në pushtet. Përmes një postimi në rrjetet sociale, ajo ka pretenduar se pas gjashtë vitesh, qeverisja aktualisht udhëhiqet nga “hajnia, skandalet e stagnimi”, ndërsa sipas saj kalimi i njerëzve nga protesta në institucione nuk kishte për qëllim ndryshimin e vendit, por formimin e një klike.

Duke iu referuar zhvillimeve jashtë vendit, Ymeri ka theksuar se komentet e saj nuk përbëjnë një vlerësim për situatën aktuale në Shqipëri, por synojnë të ofrojnë një perspektivë për brezin e ri atje. Ajo ka shtuar se “Gjendja në Shqipëri mund të nxjerrë njerëz që kanë përvojë në udhëheqje e politikë, por kalimi nga dhuna e rrugës në zyra në Kosovën e pasluftës nuk ka qenë asnjëherë një përvojë e mirë”.