Musliu kërkon raportimin e drejtorit të Policisë, refuzohet nga LVV-ja

Komisioni për Siguri miratoi planin e punës për sesionin vjeshtor, duke paraparë raportimin e institucioneve të sigurisë gjatë muajit dhjetor. Gjatë mbledhjes, deputetja e Partisë Demokratike të Kosovës, Ganimete Musliu, kërkoi që drejtori i Policisë, Gazmend Hoxha, të raportojë para ligjvënësve në fund të muajit tetor lidhur me veprimet e Policisë gjatë protestës së 5 tetorit.

Kjo kërkesë solli përplasje verbale mes deputetes Musliu dhe anëtarëve të Lëvizjes Vetëvendosje në komision. Musliu e quajti veprimin e forcave të rendit gjatë protestës, ku u kërkua miratimi i ligjit për Specialen, si joprofesional dhe joproporcional, duke shtuar se ka pranuar ankesa dhe raporte mjekësore nga qytetarët.

Deputetët e Lëvizjes Vetëvendosje, Sali Zyba dhe Ilir Qeriqi, e kundërshtuan ftesën e menjëhershme me arsyetimin se procesi hetues është në vazhdim e sipër dhe se nuk duhet ndërhyrë derisa të dalin të dhënat zyrtare. Debati u ashpërsua më tej mes Musliut dhe Qeriqit rreth përgjegjësive të kontrollit demokratik dhe njohurive për strukturën e Policisë. Krahas kësaj teme, komisioni votoi edhe Projektligjin për buxhetin për vitin 2026.