Ymeri dhe Rizvanolli përplasen në Kuvend për energjinë elektrike

Deputetja e LDK-së Janina Ymeri dhe ministrja e Ekonomisë Artane Rizvanolli kanë shkëmbyer akuza në Kuvendin e Kosovës për sektorin e energjisë elektrike, importin e rrymës, menaxhimin e KEK-ut dhe marrëveshjen për Elektroserverin. Debati mes opozitës dhe pushtetit u fokusua te shpenzimet e importit dhe ndërprerjet e energjisë.

Sektori i energjetikës në Kosovë ka qenë pikë përplasjeje midis pushtetit dhe opozitës lidhur me investimet kapitale, prodhimin vendor dhe marrëveshjet për furnizimin dhe faturimin e energjisë elektrike në pjesën veriore të vendit.

Gjatë seancës parlamentare, deputetja Janina Ymeri deklaroi se për periudhën nga ora 17:00 deri në 18:00 është planifikuar importi i 275 megavatëve energji elektrike me çmim mesatar prej 162 eurosh për megavat, gjë që sipas saj kushton mbi 46 mijë euro për vetëm një orë. Ymeri po ashtu kritikoi menaxhimin e Korporatës Energjetike të Kosovës (KEK), duke përmendur punësimin e 777 personave gjatë vitit 2025, rënien e fitimit, rënien e prodhimit dhe realizimin vetëm të pjesshëm të investimeve kapitale. Ajo ngriti shqetësime për sigurinë në punë pas vdekjes së katër punëtorëve, akuzoi për manipulime në tregun e energjisë nga disa kompani e persona, si dhe kritikoi marrëveshjen për Elektroserverin dhe furnizimin me energji në veri. Kriticizëm ndaj qeverisë për mungesën e planifikimit në energjetikë shprehu edhe deputeti i Aleancës, Burim Ramadani.

Në përgjigjen e saj, ministrja e Ekonomisë Artane Rizvanolli tha se marrëveshja për Elektroserverin e finalizuar në vitin 2022 bazohet në marrëveshjen e vitit 2013, të cilën sipas saj opozita nuk kishte qenë në gjendje ta realizonte për 11 vjet deri kur nisi faturimi dhe pagesa. Duke iu përgjigjur deputetit Burim Ramadani për ndërprerjet e energjisë, Rizvanolli krahasoi treguesin e kohës mesatare pa rrymë për familjet kosovare, duke theksuar se nga 110 orë sa kishte qenë në vitin 2018, vlerësimi për vitin 2025 është ulur në 60 orë.

Përplasjet parlamentare për importin, prodhimin dhe menaxhimin e energjisë po zhvillohen gjatë kohës kur punëtorët e KEK-ut po mbajnë protesta.

«Sa për gjendjen elektroenergjetike sot, importin nga ora 17:00 deri në 18:00, është planifikuar 275 MW dhe çmimi mesatar është 162 euro, pra për momentin që ne flasim, dhe dikush pallavra, dikush të vërtetën, na kushton ora që duhet të jetë me çmim mesatar mbi 46 mijë euro. Vetëm për këtë orë që po flasim ne. Kjo është edhe gjendja mbas 6 vjet qeverisje, në sektorin e elektroenergjetikës», tha Ymeri.

«Është e vërtetë që e kemi finalizuar marrëveshjen në 2022, mirëpo kjo është e bazuar në një marrëveshje të cilën na nuk e kemi dashtë të vitit 2013, mirëpo as atë nuk keni qenë në gjendje me realizu. Është dashur me ardhur ne pas 11 vjetëve edhe me filluar faturimi edhe me filluar pagesa atje», tha Rizvanolli.