Yll Limani dhuron instrumente për Shkollën e Muzikës "Prenk Jakova"

PRISHTINË — Këngëtari Yll Limani dhuroi instrumente muzikore për nxënësit e Shkollës së Muzikës "Prenk Jakova" në Prishtinë, gjatë një ceremonie ku ishte i pranishëm edhe kryetari i Kryeqytetit, Perparim Rama.

Limani tha se sa më shumë investime të ketë në arsim e kulturë, aq më shumë të rinj do të arsimohen dhe do të edukohen, gjë që e vlerësoi të mirë për Prishtinën dhe për gjithë Kosovën. "Ka qenë më e pakta që kemi mundur ta bëjmë, aq sa kemi mundur të gjejmë instrumente të disponueshme, ndriçim për këtë sallë, për këtë shkollë, e kemi bërë," tha ai.

Këngëtari sqaroi se ky nuk do të jetë kontributi i fundit për shkollën "Prenk Jakova". Sipas tij, sa më shumë të krijohen kushte dhe mundësi që talentët e rinj të vijnë e të arsimohen këtu, aq më mirë është për Prishtinën, për vendin dhe për Kosovën.

Kryetari Rama e falënderoi Limanin për donacionin dhe tha se Komuna investon në art e kulturë, përveç investimeve në infrastrukturë si asfaltimi dhe kanalizimet. Ai njoftoi se më 24 dhe 25 korrik Limani do të mbajë një koncert në kryeqytet, duke thënë se këngëtari e "prezanton Prishtinën, Kosovën, e gjithë Shqiptarinë në mënyrën më të mirë të mundur."

Drejtori i shkollës, Driton Saqipi, u shpreh se shpreson që edhe artistë të tjerë të ndjekin shembullin e Limanit dhe të mbështesin talentët e rinj. "Jemi e vetmja shkollë artistike në qytet, e kemi dëshmuar sidomos viteve të fundit, kori, orkestra, baleti, kanë arritur një nivel artistik shumë të lartë," tha ai.

I pyetur nëse ky ishte gjesti i tij i parë human, Limani tha se veprimtarinë bamirëse e mban zakonisht në fshehtësi. Ai përmendi se ndihmon kafshët "në mënyrë të jashtëzakonshme", përveç akteve të tjera bamirëse që i bën në heshtje, pa kërkuar konfirmim publik.

Burim: Zëri
— Redaksia ZHURMA