Zvicra mposht Kolumbinë 4:3 në penallti

SHBA — Zvicra shkroi histori të martën mbrëmë, duke u kualifikuar në çerekfinale të Kupës së Botës për herën e parë që nga viti 1954. Ekipi i drejtuar nga kapiteni Granit Xhaka mundi Kolumbinë 4:3 në penallti, pas barazimit pa gola në kohën e rregullt dhe në vazhdime.

Xhaka, që ka 151 ndeshje për kombëtaren, realizoi penalltinë e parë për Zvicrën, duke hapur rrugën drejt suksesit. Sipas radhës së paracaktuar, ai duhej të gjuante penalltinë e tretë, por vendosi vetë të merrte përgjegjësinë e parë.

"Në fakt unë është dashur të gjuaj penalltinë e tretë," ka treguar Xhaka. "Pastaj i thashë trajnerit se doja të isha i pari dhe të merrja përgjegjësi, siç i takon një kapiteni," ka thënë ai për televizionin zviceran SRF, menjëherë pas ndeshjes.

Gregor Kobel ndali gjuajtjen e Cucho Hernandezit në një nga momentet vendimtare të serisë, ndërsa Davinson Sanchez, për Kolumbinë, goditi traversën. Te Zvicra dështoi vetëm Manuel Akanji, i cili gjuajti lart mbi portë.

Kualifikimi është historik: në tre Botërorët e kaluar, Zvicra ishte ndalur gjithmonë në raundin e parë nokaut, në një të tetën e finales. Në këtë edicion është shtuar edhe një raund nokauti, dhe helvetikët tashmë kanë kaluar dy kundërshtarë radhazi në ndeshjet me eliminim direkt.

"Ishte një shfaqje e jashtëzakonshme e forcës mendore — vullneti fitoi. Kemi bërë histori, është ndjenjë e pabesueshme. Lehtësimi na bën jashtëzakonisht krenarë," tha Xhaka. "Kemi pritur shumë gjatë për të shkruar një tregim si ky. Tani rrugëtimi vazhdon dhe ne jemi të lumtur që ende jemi këtu."

Në çerekfinale, Zvicra përballet me Argjentinën e Lionel Messit. "Qëllimi numër një është arritur, por kur je në çerekfinale, uria është më e madhe se më parë. Tani vjen sfida e madhe me një nga lojtarët më të mëdhenj," ka theksuar Xhaka.

Burim: Koha.net
— Redaksia ZHURMA