Vllaznia e Apolonia eliminohen nga Champions-i — humbje 1-2 dhe 4-0
Shkodranet u mposhtën 1-2 nga Spartak Myjava në Qipro, ndërsa fieraket pësuan humbje 4-0 përballë Hammarby në Itali.
LIMASOL — Vllaznia dhe Apolonia e vajzave kanë mbyllur rrugëtimin e tyre në Ligën e Kampioneve pas humbjeve të pësuara në ndeshjet e raundit të dytë. Skuadra shkodrane u mposht në Qipro me rezultatin e ngushtë 1-2 nga sllovaket e Spartak Myjava, ndërsa ekipi fierak nuk arriti të rivalizonte suedezet e Hammarby duke humbur 4-0.
Në sfidën e zhvilluar në tokën qipriote, Spartak Myjava shënoi golin e parë në minutën e 42-të dhe dyfishoi shifrat në minutën e 68-të. Vllaznia reagoi gjashtë minuta më vonë me anë të kapitenes Megi Doçi, e cila shënoi me një goditje të fortë nga distanca, por shkodranet nuk mundën të barazonin deri në vërshëllimën e fundit.
Ndërkohë, Apolonia pësoi një disfatë të thellë në Biella të Italisë, ku Hammarby shënoi dy herë në pjesën e parë dhe shtoi edhe dy gola të tjerë në pjesën e dytë. Të dyja skuadrat shqiptare do të luajnë ndeshjet e fundit për renditje më 8 gusht, respektivisht ndaj Apollon Limassol dhe humbëses së çiftit Juventus-Torreense.
Burim: Shqiptarja
— Redaksia ZHURMA