Vitia: Kërkesa për palbociclib u dyfishua dhe tenderi i parë dështoi

Ministri i Shëndetësisë, Arben Vitia, deklaroi se mungesa e medikamentit palbociclib në Klinikën e Onkologjisë gjatë vitit 2026 ka ardhur si pasojë e dyfishimit të kërkesave nga pacientët dhe dështimit të tenderit të parë për shkak të mungesës së ofertuesve. Deklarata u bë gjatë interpelancës parlamentare pas vdekjes së pacientes me kancer të gjirit që mbeti katër muaj pa terapi.

Përballja në Kuvend erdhi pas pyetjeve të deputetes së PDK-së, Sala Jashari, lidhur me vdekjen e pacientes dhe mungesën e përgjithshme të barnave onkologjike. Bari palbociclib u përfshi për herë të parë në Listën e Barnave Esenciale në Kosovë për vitin 2025. Më parë, pacientët e kishin siguruar këtë medikament në mënyrë private, por me futjen e tij në listën zyrtare, kërkesat pranë sistemit publik shëndetësor u rritën menjëherë.

Planifikimi fillestar i Ministrisë së Shëndetësisë ishte bërë vetëm për 40 pacientë, bazuar në të dhënat e mëparshme të Klinikës së Onkologjisë, njoftoi Vitia. Ai sqaroi se Ministria e Financave e kishte miratuar kërkesën për buxhet shtesë dhe kontrata e parë u lidh më 17 korrik, ndërsa furnizimi i parë arriti në barnatoren qendrore në Çekukë në mesin e gushtit 2025. Sidoqoftë, për shkak të fluksit të ri të pacientëve, kontrata e paraparë për një vit u shpenzua në masën 130% brenda nëntë muajve.

Hapja e procedurave të reja u pengua nga vonesat në miratimin e buxhetit dhe shpërbërja e Kuvendit në muajin prill për shkak të zgjedhjeve të 7 qershorit, bëri të ditur ministri. Pas hyrjes në fuqi të ligjit të buxhetit dhe transferimit të mjeteve, MSH hapërimisht hapi tenderin e ri, por oferta e parë dështoi pasi nuk pati asnjë ofertues. Më pas u përdorën procedura të përshpejtuara, duke mundësuar lidhjen e kontratës më 30 korrik 2026 dhe nisjen e liferimit në barnatoren qendrore më 18 gusht.

Lidhur me furnizimin e përgjithshëm gjatë vitit 2026, Vitia theksoi se niveli i furnizimit me barna në Onkologji nuk ka qenë i njëjtë me vitet 2024 dhe 2025. Ndër shkaqet e tjera të kësaj gjendjeje, ai përmendi mungesën e autorizimeve të marketingut për disa produkte, vonesat procedurale, dështimet nga mungesa e ofertuesve dhe tejkalimin e çmimeve të parashikuara në listën zyrtare.

«Gjatë kësaj kohe është parë se ka kërkesa më të larta për këtë medikament, pasi që një pjesë e pacientëve të cilët e kanë siguruar më herët privatisht, duke mos qenë në listën e barnave esenciale, kur është futur ky bar në listën e barnave esenciale, kanë filluar normalisht ta kërkojnë këtë medikament në klinikën e onkologjisë», deklaroi Vitia.